Ontmoet die beoordelaars en aanbieders van die meestersklasse
Prosa: Roeline Daneel
Die aktrise en stemkunstenaar Roeline Daneel is bekend vir haar rol as Alta-Marie in die telenovelle Arendsvlei. Sy het die rol van Mika in die dramareeks Kompleks vertolk. Sy is in 2018 vir ’n Suid-Afrikaanse Rolprent-en-TV-prys (Safta) benoem vir haar rol as Jan van Riebeeck se vrou, Maria, in die fliek Krotoa. Roeline was onlangs te sien in die dramareeks Fraksie as Nina Smit.
Poësie: Frieda van den Heever
Frieda van den Heever is ’n aktrise, musikant, regisseur en stemkunstenaar. Sy was voorheen aanbieder van die RSG-programme Vers en Klank en Kortom. Sy het in 2021 ’n Fiësta-toekenning gewen vir die regie van die toneelstuk Die Poet, Wie’s Hy?
Redenaars: Sue Pyler–Slabbert
Sue Pyler-Slabbert is ’n bekroonde radio-omroeper, nuusleser, regisseur, aktrise en stemkunstenaar. Sy het al verskeie programme op RSG aangebied, onder meer die ontbytprogram Op en Wakker. Sy doen ook die voorlesing van Huisgenoot se artikels op Huisgenoot.com.
Sang: Lynelle Kenned
Lynelle Kenned is ’n bekroonde sangeres wat al te sien was in bekende musiekblyspele soos West Side Story en The Sound of Music. Sy is ook ’n talentvolle aktrise en televisie-aanbieder van leefstylprogramme soos onder meer Pasella, Uit die spens en Jý geld.
Dans: Natasha van der Merwe
Natasha van der Merwe is ’n sanger, aktrise en danser. Sy is ’n opgeleide instrukteur van moderne en klopdanse. Sy was al te sien in verskeie teaterproduksies soos Mamma Mia!, Rock of Ages, Peter Pan, Doringrosie en Aspoestertjie. Sy was ook deel van die musiekblyspel Chicago wat reg oor die wêreld getoer en opgetree het. Sy is veral bekend vir haar rol as Suzie in die kykNET-sepie Suidooster.
Koor: Leon Starker
Leon Starker is sedert 2003 die dirigent van die Kaapstadse Jeugkoor, wat deesdae as die Kaapstad Camerata bekend staan. Die koor het al opgetree in Carnegie Hall in New York, die St. Paul’s Cathedral in Londen en die Mozarteum Großer Saal in Salzburg, Oostenryk. Leon het ’n M.Mus. in koordirigering en het ook drie jaar lank klas gegee aan die Universiteit van Kaapstad se musiekskool.